01.07.2019.

Negda je dišalo vu Svinjaričima, a jel bu pak, nosi buju svedoki

Denite cev i nek se mlin okreče!

Vu zadnje vreme nekak mi se činilo da mi je oslabil novinarski nos. Nos mi stoji, al nekak ne njušim dobro. Kak da mi se njuh potrošil... Negda sam mogel našnjofat pečenog odojka na 300 metri. Sumporeni gemišt sam njušil i prije nek sam došel do susedove kleti. Finije stvari, kak naprimer, mlevenu kuruzu, detektiral sam na 100 metri zračne linije.

Najbolje je dišala mlevena šenica kad sam prolazil uz mlin vu Svinjaričima. I prekčera sam tuda išel, al mlin mi ni dišal! Kružim okolo mlina, gazda me sumnjivo gledi kak se okolo motam i kak pes po vuglima šnjofam.

- Kak je tu negdar fino dišalo - velim mu ja.

- Je, je... negdar... - veli na to mlinar.

- A zakaj sad niš ne osetim? Kak je samo fino dišala ona bela mela... – ne dam se ja.

- Kak bu kaj dišalo kad mlin tri leta ne dela, Bog s tobom - otepe se na kraju nekak živčano on.

Taj dan, kad sam ja testiral svojega njuha, srećom je bila nedela pa je čovek imal cajta da mi se polahko spripoveda. Ponudil mi je gazda Dragec svoju rakiju (dišala je po hruški) i baš smo se lepo pospominali - onak muški.

Rekel mi je se kaj mu je na duši i da mlin ne dela, jer nema vode. Voda je z jedne strane ceste, a ovaj mlinček je z druge strane. Rekel sam mu da meni nigdar ni bilo važno kaj je nekaj levega ili desnega. Najvažnije je jel stvar dela il pak ne... Onda smo računali i došli do brojke od sto i pedeset let. Ja sam prekopal po arhivi i zaključil da je mlin delal dok smo se nas dva 1961. zlegli. I delal je 1979., delal je i 2005., a bome još i 2015.

Gazda vadi debelu knjigu o Samoboru, a tam se lepo vidi kak se mlinsko kolo okreče. Na stol več drugu flašu rakije meče... Vidim mu na faci - samo kaj mu suza ne poteče. Meni se od pijače celi mlin sad okreče. I tak vu praznom mlinu sedimo nas dva, ja mu tumačim da su slike v knjigi se moje, pak mu je postalo jasnije zakaj tuda oko mlina z aparatlinom šnjofam. Mlin je tu bil još dok je deda njegovog dede tu, kak mi sad, rakiju pil... Dok su ga delali, datum na mlin nisu deli, al je ziher da su na ovom mestu kuruzu najmanje 150 let mleli...

A onda se pred dva, tri leta zmenila klima, došla je velika voda, a Breganica je poplavila cestu. Valda je i voda štela silom dojti poprečki do mlina. Vodi niš ne znači ni levo ni desno. Ide navek tam di joj ni tesno. Došli su onda bageri iz Komunalca i maknuli su se te velke balvane i granje, skopali korito potoka dublje i sad je cev kaj spaja mlin i vodu gore na suhom, metar više. Mlinar Dragec radi tega sad tak teško diše...

- A baš smo prije toga novi črep deli i rado bi pak mleli, al nejde - nismo imali sreće - bez vode se mlinsko kolo ne okreče - veli i samo kaj se ne rasplače.

Pa kaj treba napraviti, jednu cev dublje zakopati, drvenu riglu na cev deti... Danas, vu vreme interneta pustit malo vode na stari mlin ni neka nauka... Dajte ljudi, malo optimizma. Vidim da bager tu baš sad nekaj kopa...

Velim mu da za ruralni razvoj lovu deli cela i Europa, ak mlinček ne dobi vodu bu se rasušil i sam od sebe zrušil i ostali bumo bez mlina... A poglečte kak je lepi - videti ga je milina. A još da čujete samo kak veselo klopoče... Mislim ja da tu ima pomoči, samo ak se hoče!

Ja sam rešil dilemu svjega njuha. Nadam se da kad ovo pročitaju gradski oci (i majke) da bu za stari mlin neko imal bar malo sluha. Mlin je pitanje naše baštine, kulture, duha... Nisu to cajke!

Bum za koji dan išel vu poglavarstvo testirat svog nosa jel se kaj "kuha". Pak ne košta ta cev milijune! Kaj ni bolše da mlin dela, nek da trune?!

Mlinar mi je rekel da na najži čuva još vreču domače kuruze. Ak bu za mlin sluha, ja bum pak na kilometar osetil miris domačega kruha.

Več vidim kak se mlinar smeje od vuha do vuha...

Romeo Ibrišević

 

Negda je dišalo vu Svinjaričima, a jel bu pak, nosi buju svedoki

Arhiva 2019

2018

2017

2016

2015

2014

2013

2012

2011

2010

2009

2008

2007

2006

2005

2004

2003

2002